Í dag, 1.febrúar, er dagur kvenfélagskonunnar og fagnar Félag kvenna í Kópavogi (FKK) jafnframt tveggja ára starfsafmæli.
Síðustu 12 mánuðir hafa fært félaginu ýmsar áskoranir og hefur félagsstarf að mestu legið í dvala en nú er útlit fyrir bjartari tíma. Það gleður okkur líka að segja frá því að FKK leggur sitt af mörkum til samfélagsins og tekur fullan þátt í landssöfnuninni Gjöf til allra kvenna á Íslandi. Safnað er fyrir tækjum og búnaði sem mun stuðla að bættri heilsuvernd kvenna um land allt.
Kópavogsbúar geta lagt sitt af mörkum með því að kaupa armbönd og súkkulaði af Félagi kvenna í Kópavogi en allur ágóði rennur beint í söfnunina. Þó henni ljúki formlega í dag, 1.febrúar 2021, gefst kostur á að leggja inn í söfnunina til 15.febrúar næstkomandi.
Félagið þakkar Kópavogsbúum hlýjar móttökur og hlakkar til samstarfsins á komandi árum.
Að lokum er gaman að rifja upp að þó FKK sé nýtt kvenfélag í Kópavogi eiga kvenfélög í Kópavogi rætur sínar að rekja allt aftur til 1967.
Meðfylgjandi er smá brot úr bókinni “Margar hlýjar hendur” eftir Sigríði Thorlacius en eftirfarandi brot fjallar um stofnun Kvenfélagasambands Kópavogs:
“Kvenfélagasamband Kópavogs, skammstafað K.S.K., var stofnað hinn 9.febrúar 1967, að Neðstutröð 4, Kópavogi. Aðalhvatamenn að stofnun þess voru Áslaug Eggertsdóttir, Sigríður Gísladóttir og Jóhanna Bjarnfreðsdóttir.
Að sambandinu standa þrjú félög – Kvenfélag Kópavogs, Sjálfstæðiskvennafélagið Edda og Freyja, félag framsóknarkvenna.
Tilgangur félagsins er að efla heimilisvísindi og starfa að menningar- og mannúðarmálum í Kópavogskaupstað. Sambandið hyggst ná tilgangi sínum með því að tengja saman einstök kvenfélög á sambandssvæðinu og koma á samvinnu þeirra í milli.“