Um leið og við þökkum góðar móttökur á fyrsta starfsári Félags kvenna í Kópavogi boðum við til aðalfundar félagsins, föstudaginn 21. febrúar n.k., kl. 20.00. Fundurinn verður haldinn í sal Siglingafélagsins Ýmis við Naustavör 20 (sjá hér).
Við vekjum athygli á að allar konur sem greitt hafa félagsgjöldin hafa atkvæðisrétt á fundinum.
Dagskrá fundarins er eftirfarandi
- Kosning fundarstjóra og fundarritara
- Skýrsla stjórnar lögð fram
- Ársreikningur lagður fram til samþykktar
- Lagabreytingar
- Ákvörðun félagsgjalds
- Kosning stjórnar
- Kynning á dagskrá vetrarins
- Önnur mál
Fyrir fundinum liggur lagabreytingartillaga (sjá hér að neðan).
Öll sæti í stjórn eru laus, að undanskildum sætum formanns og fjármálafulltrúa sem eru kosin til tveggja ára. Allar stjórnarkonur gefa kost á sér til áframhaldandi setu að Brynhildi Jónsdóttur, fjármálafulltrúa undanskilinni og Kristínu Björk Viðarsdóttur, upplýsingafulltrúa. Þórhildur Guðsteinsdóttir flyst úr sæti varamanns og tekur við sem fjármálafulltrúi.
Eftirfarandi konur eru í framboði:
- Eva Michelsen, varaformaður
- Harpa B. Hjálmtýsdóttir, upplýsingafulltrúi
- Kristín Björk Viðarsdóttir, varamaður
- Anna Rut Steinsdóttir, skoðunarmaður reikninga
Auglýsum því eftir konum til að gegna eftirfarandi embættum:
- Viðburðafulltrúi
- Skoðunarmaður reikninga
Áhugasamar geta sent inn framboð með því að smella hér.
Að loknum aðalfundi, eða um kl. 21.15. skiptum við yfir í opinn félagsfund. Þar verða bornar fram léttar veitingar. Verðum með posa á staðnum.
Þar sem við viljum efla og stækka félagið okkar hvetjum við félagskonur til þess að bjóða með sér gestum á félagsfundinn. Við tökum vel á móti öllum sem vilja kynna sér starfsemi félagsins og gleðjast með öðrum kvenfélagskonum.
Við vekjum athygli á að til sölu verða armbönd og súkkulaði í landssöfnun kvenfélaga til kaupa á tækjum og hugbúnaði sem mun þjóna öllum konum um land allt. Nánar verður sagt frá söfnuninni á fundinum.
Við hvetjum allar konur í Kópavogi til að fjölmenna á opna fundinn, kynna sér starfsemi félagsins og eiga með okkur skemmtilega kvöldstund.
Vinsamlegast merkið við mætingu með því að skrá ykkur sem “mæti / going” á Facebook viðburðinum inn á Facebook síðu félagsins (sjá hér) eða sendið okkur línu á fkk@fkk.is
Með kvenfélagskveðju,
Stjórn Félags kvenna í Kópavogi
Tillaga að lagabreytingum:
Skv. samþykktum4. g. Félagsaðild.
Allar konur, 18 ára og eldri, sem eru tilbúnar að vinna samkvæmt stefnuskrá félagsins, óháð búsetu geta orðið félagar. Inntökubeiðni skal bera fram á félagsfundi og þar fer inntaka fram.
Þær félagskonur einar sem gert hafa upp full skil á félagsgjöldum sínum teljast fullgildir félagar og hafa atkvæðisrétt á aðalfundi. Þær konur sem ekki greiða árgjöld sín til félagsins tvö ár í röð, þrátt fyrir að hafa verið minntar á það, falla út af félagsskrá. Konur sem hafa verið virkir meðlimir í kvenfélagi í bæjarfélaginu til margra ára greiði árgjald til 75 ára aldurs og gerast þá sjálfkrafa heiðursfélagar.
Breytingartillaga:
4. g. Félagsaðild.
Allar konur, 18 ára og eldri, sem eru tilbúnar að vinna samkvæmt stefnuskrá félagsins, óháð búsetu geta orðið félagar.
Þær félagskonur einar sem gert hafa upp full skil á félagsgjöldum sínum teljast fullgildir félagar og hafa atkvæðisrétt á aðalfundi. Þær konur sem ekki greiða árgjöld sín til félagsins tvö ár í röð, þrátt fyrir að hafa verið minntar á það, falla út af félagsskrá. Félagskonur sem hafa náð 75 ára aldri greiða grunngjald, sem nemur 25% af árgjaldi félagsins.
Samþykktir FKK með undirskriftum frá stofnfundi félagsins þann 1.febrúar 2019.