Fréttir

Fyrsti félagsfundur vetrarins var haldinn í Sunnuhlíð, miðvikudaginn 30. október 2019.

Á fundinn mætti Hörður Sveinsson, framþróunar og nýsköpunar ráðgjafa hjá Nýlausn og fór yfir niðurstöður frá vinnusmiðjunni sem FKK hélt 5. október síðastliðin. 

Þar kom fram að félagskonur höfðu áhuga á að sitja námskeið, fyrirlestra eða námskeið af ýmissum toga. Búa til aðstæður þar sem væri verið að fræðast og skemmta sér á saman tíma. Áhersla var lögð á að láta gott af sér leiða og voru margar uppástungur skrásettar um hvaða verkefni FKK gæti tekið að sér til þess að styðja við og veita aðstoð.

Á vinnusmiðjunni var lagður grunnur að hvaða nefndir þurfti að koma í gang og voru þrjú skráningarblöð lögð fram á fundinum fyrir:

• Viðburðarnefnd
  Sér um að skipuleggja fræðslu, kynningar og námskeið fyrir félagskonur og skipuleggja sérstaka viðburði, veislur, ferðalög og skemmtanir á öðrum dögum. Vinnur náið með styrktar- og fjáröflunarnefnd þar sem viðburðir skipulagðir af þessari nefnd geta verið fjáröflunar tækifæri. Nefndin velur eina dömu ár hvert til þess að vera stýra nefndarinnar og hún vinnur með og miðlar upplýsingum til Stjórnar FKK og situr í Aðalstjórn. Viðburðarnefnd sér um að finna áhugverða einstaklinga til að koma og kynna fyrir félagskonur sem og komast að því hvaða mannauð og þekkingu við eigum Innan félagsins til þess að geta verið með kynningar sem og kennslu. 
• Veitingarnefnd
  Sér um að virkja konur til að koma með veitingar á félagsfundi. Vinnur náið með Viðburðarnefnd í skipulagi hver kyns sölu veitinga sem félagið tekur að sér. Einnig ef panta þarf veitingar á tilteknum viðburðum t.d. Árshátíð eða viðburði, þegar félagskonur sjá ekki um kaffi/veitingar. 
• Styrktar- og fjáröflunarnefnd
  Hefur augun opin fyrir styrkjum sem félagið gæti sótt um, skrifar umsóknir og sækir um fyrir hönd félagsins. Leitar eftir verkefnum til þess að styrkja og hvernig félagið gæti farið að því að virkja konur til að safna í verkefnið og láti gott af sér leiða. Styrktar- og fjáröflunarnefnd vinnur náið með viðburðar- og veitingarnefnd þar sem nefndirnar geta haft þekkingu á styrkleika félagskvenna og hvar sé hægt að leita innblásturs í mannauð og þekkingu til þess að búa til verðug verkefni sem félagskonur vilji taka að sér.

Viðburðarnefnd fékk góðar viðtökur og mótaðist hún strax á fundinum. Einungis ein skráði sig í veitinganefn og enginn kona skráði sig í Styrktar- og fjáröflunarnefnd. Sem byrjunarskref lýtur þetta vel út en hugsanlega þarf að endurskoða nefndarskiptin. 

Vetrarstarf var rætt og var samrómur um það að annar miðvikudagurinn í mánuði væri flottur dagur til að festa niður fyrir félagsfundi. 

Jenný Jóakimsdóttir, FKK félagskona og starfsmaður hjá Kvenfélagasamband Íslands kynnti tvö áhugaverð fjáröflunartækifæri fyrir félagskonur. Það fyrra tengist gjörningi sem Þjóðleikhúsið og Kvenfélgassamband Íslands vinnur að og það seinna tengist söfnunina vegna 90 ár afmælis Kvenfélgassamband Íslands sem verður á næsta ári. Sjáið myndina hér fyrir neðan til að sjá nánar um afmælis söfnina.   

Góður fundur í alla staði en best var þó að taka tíma til að ræða saman og kynnast öðrum félagskonum.

Góð þátttaka og frábærar viðtökur við vinnusmiðju félagskvenna sem fór fram laugardaginn 5. október síðastliðinn í Bókasafni Kópavogs.

Sóst var eftir því að fá fram skoðun félagskvenna á hvaða áherslur félagið ætti að einblína á sama tíma að eiga saman góða stund þar sem félagskonur fengi tækifæri til þess að marka stefnu og tilgang félagsins.

Stjórnin fékk Hörð Sveinsson, framþróunar og nýsköpunar ráðgjafa hjá Nýlausn til að aðstoða stjórnina við uppsetningu og að leiða vinnusmiðjuna. Hann sérhæfir sig í að aðstoða skipulagsheildir í stefnumótun og því tilvalinn í verkið. Vinnusmiðjunni  var skipt upp í þrjár smiðjur þar sem lagar voru fram spurningar um innra og ytra starf og hvar það skarast á. Félagskonum var skipt upp í hópa og unnu hóparnir saman við að svara spurningum og koma með uppástungur á hugmyndablöðum til þess að virkja félagskonur og fá hugmyndir þeirra fram um hvernig þær sæu fyrir sér starfsemina og mótun félagsins.

Að vinnusmiðjunni lokinni vann Hörður úr þeim þremur spurningablöðum sem hver þátttakandi svaraði og hugmyndablöðunum, sem voru meira en 200 talsins. Hann mun svo mæta á næsta félagsfund og kynna niðurstöður fyrir félagskonum. 

Vinnusmiðjan var einstaklega vel heppnuð og voru allar félagskonur sammála um að vinnusmiðju mætti halda á hverju ári til þess að skerpa á áherslum félagsins. 

Meðfylgjandi mynd var tekin meðan á vinnusmiðjunni stóð og má finna fleiri myndir í myndaalbúmi.

Félag kvenna í Kópavogi hélt sinn fyrsta félagsfund fimmtudaginn 23. maí.

Hátt í 40 konur mættu á fyrsta fund félagsins sem haldin var í matsal Sunnuhlíðar í Kópavogi.

Stjórn sá um veitingar og kynnti félagaskráningu og fjármál félagsins. Fundaraðstaða var einnig rædd.

Stjórn FKK hefur verið að vinna ötullega að því að finna húsnæði til þess að funda í og fann það loksins með því að fá ábendingu frá félagskonu. Félagið hefur þá fengið samastað núna um sinn.

Stjórninn hefur í hyggju að halda vinnusmiðju með félagskonum í september og var sú hugmynd kynnt, félagskonur tóku mjög vel í þá hugmynd.

Allt í allt var þetta vel heppnaður fundur í björtu og fallegu rými.

Fyrsta vorferð félagsins var farin þann 11.maí 2019.

Í ferðina mættu rúmlega 20 galvaskar Kópavogskonur sem skelltu sér austur fyrir fjall að heimsækja kvenfélagssystur á Eyrarbakka. 

Kvenfélag Eyrarbakka tók á móti félagskonum með glæsibrag og heimsóttu þær saman Konubókastofu.

Það var svo sannarlega fróðlegt að kynnast því góða starfi sem Konubókastofa er að gera. Markmið Konubókastofu er að halda til haga þeim ritverkum sem íslenskar konur hafa skrifað í gegnum tíðina. Samtímis að verkin séu aðgengileg þannig að hver og einn geti komið og fræðst um þau og höfunda þeirra. Rannveig Anna Jónsdóttir kaus að kalla safnið stofu þar sem hugmyndin er í framtíðinni að safnið verði staðsett í húsi þar sem gott er að koma og setjast inni í stofu og glugga í safnkost, jafnvel með kaffibolla í hönd. 

Sagði okkur einnig að hugmyndin að safninu hafi byrjað að gerjast hjá sér þegar hún var í bókmenntafræði við Háskóla Íslands og Helga Kress bókmenntafræðingur sýndi nemendum fram á hversu mikið af verkum íslenskra kvenna hefðu farið forgörðum. 

Í þessu netta húsnæði eru ótal bækur og sagði Anna félagskonum hvernig það væri æðislegt að eiga eitt eintak af hverri útgefinni bók eftir íslenskar konur, það sé þó háleitt markmið og þær hafi ekki pláss fyrir það núna. Það sé hægt að fletta upp hvaða bækur er hægt að finna á safninu þannig að vilji einstaklingar losa sig við bækur er hægt að fletta upp hvort hana vanti. En barnabækur væri eitthvað sem stofan vilji endilega sjá, þær eru síður gefnar eða eru svo vel lesnar heima að þær endi með því að detta í sundur. Þeir sem sækja stofuna eru áhugafólk um íslenskar bókmenntir, jafnt innlendir sem erlendir gestir. Þetta er stofa sem er í sífelldri endurnýjun þar sem bækur halda áfram að koma út í landinu og nýir höfundar bætast því við.

Frá Konubókastofu labbaði hópurinn yfir í Húsið sem er bæði andlit Byggðasafns Árnesinga og eitt nokkurra húsa sem segja sögu Eyrarbakka. Þar fengum við einnig frábærar móttökur og flotta frásögn um sögu hússins og leiðsögn. Að heimsóknum loknum lá leiðin í fordrykk í boði félagsins í Einarshúsi á Eyrarbakka. Þar ræður ríkjum Ásta Hjálmtýsdóttir, félagskona í FKK, sem var svo hugguleg að bjóða okkur heim.

Eftir góða stund í Einarshúsi, var gengið yfir á Rauða Húsið þar sem við vorum með efri hæðina út af fyrir okkur.  Að loknum góðum degi lögðum við svo af stað heim með langferðabifreið frá Teiti.

Markmið ferðarinnar átti að vera að gefa félagskonum tækifæri til þess að eiga góðan dag og á sama tíma að gefa okkur tækifæri til þess að kynnast betur. Við getum sko sagt að því markmiði hafi verið náð. Ekki bara að kynnast konum í FKK heldur voru tengsl einnig mynduð við Kvenfélagið á Eyrabakka á sama tíma og við fengum innsýn inn í sögu og frábært starf sem á sér stað á Eyrabakka. 

Stórkostlegur dagur í alla staði!

Fyrsti viðburður Félags kvenna í Kópavogi, eftir stofnfund félagsins, var haldinn fimmtudaginn 11. apríl 2019 í samkomusalnum á  Hallveigarstöðum, félagsheimili Kvenfélagasambands Íslands að Túngötu 14.

Um var að ræða fræðslu- og vinkonukvöld þar sem Margrét Blöndal, EMDR þerapisti og handleiðari og hjúkrunarfræðingur hjá EMDR stofunni  hélt fyrirlestur um áhrif áfalla á heilann.

Margrét snerti á viðfangsefnum eins og áföllum, áfallastreitu, afleiðingum og úrvinnslu þeirra. Að loknum góðum fyrirlestri sátu konur áfram, fengu sér aðeins meira af kaffi og kökum sem í boði voru.

Þegar dömur fóru bauðst þeim að taka með sér gjafir sem félaginu barst fyrir fundinn en það voru eintök af tímaritinu Húsfreyjan og gjafapoki frá Florealis. 

Þökkum við velunnurum fyrir gjafirnar!

Á degi kvenfélagskonunnar, 1. febrúar, var Félag kvenna í Kópavogi formlega stofnað á stofnfundi sem haldinn var í húsnæði Siglingafélagsins Ýmis að Naustavör 20, í 200 Kópavogi.

Á stofnfundinn mættu hátt í 80 konur og var vel tekið í að stofna nýtt kvenfélag í Kópavogi.

Kosið var í stjórn og samanstendur hún af fimm stjórnarkonum og tveimur varakonum, þeim:

• Bryndísi Steinu Friðgeirsdóttur, formanni, kosin til tveggja ára.
• Evu Michelsen, varaformanni, kosin til eins árs.
• Brynhildi Jónsdóttur, fjármálafulltrúa, kosin til tveggja ára.
• Kristínu Björk Viðarsdóttur, upplýsingafulltrúa, kosin til eins árs.
• Hörpu B. Hjálmtýsdóttur, viðburðarstjóra, kosin til eins árs.
• Ástu Hjálmtýsdóttur, varakonu
• Þórhildi Guðsteinsdóttur, varakonu

Tillaga um að félagið fengi nafnið Félag kenna í Kópavogi var lögð fram og samþykkt á fundinum. Starfssvæði þess og varnarþing er Kópavogur. Félagið er í Kvenfélagasambandi Kópavogs og því aðili að Kvenfélagasambandi Íslands og Norræna kvennasambandinu NKF og ACWW sem er Alþjóðasamband dreifbýliskvenna.

Tilgangur félagsins til að byrja með er að:

• Stuðla að samvinnu félagskvenna og félagslegri þekkingu.
• Efla félagslegt starf meðal kvenna í Kópavogi.
• Vinna að hagsmuna- og réttindamálum kvenna í hvers konar starfi og atvinnurekstri, er horfir til framfaramála, aukinnar menningar og/eða samfélagslegrar framgöngu kvenna.
• Styrkja framgang kvenna og þeirra málefni með fundarhöldum, viðræðum, fyrirlestrum og námskeiðum.
• Afla fjár til að styrkja og styðja við líknar- og menningarmál.

Tilgangi sínum hyggst félagið ná með:

• Fræðslu og skemmtisamkomum fyrir félagskonur og gesti þeirra.
• Fyrirlestrum og námskeiðum.
• Umræðu um þau málefni sem félagskonur telja félagið varða.
• Samtölum við fyrirtæki, sveitarfélag og ríki í tengslum við verkefni sem félagið sinnir og telur brýnt hverju sinni.

Kærar þakkir fyrir þessa frábæru mætingu og allar þær kveðjur sem bárust.